နိုင်ငံတကာအဖွဲ့အစည်းများမှ မြန်မာနိုင်ငံကို ထောက်ပံ့ရန် သဘောတူညီမှု အမေရိကန်ဒေါ်လာ သန်းနှစ်ထောင်နီးပါး ရှိ

နိုင်ငံတကာအဖွဲ့အစည်းများမှ မြန်မာနိုင်ငံကို ထောက်ပံ့ရန် သဘောတူညီမှု အမေရိကန်ဒေါ်လာ သန်းနှစ်ထောင်နီးပါး ရှိ
မြန်မာအစိုးရ၏ ကိုဗစ်-၁၉ စီးပွားရေးကယ်ဆယ်ရေးစီမံကိန်း (CERP) တွင်ပါဝင်သည့် လုပ်ငန်းဆောင်ရွက်ချက်များအတွက် နိုင်ငံတကာဖွံ့ဖြိုးရေးမိတ်ဖက်အဖွဲ့ လေး၊ ငါးခုမှ အမေရိကန်ဒေါ်လာ သန်းနှစ်ထောင်နီးပါး ကူညီထောက်ပံ့ရန် သဘောတူညီထားပြီးဖြစ်ကြောင်း စီမံကိန်း၊ ဘဏ္ဍာရေးနှင့် စက်မှုဝန်ကြီးဌာန ဒုတိယဝန်ကြီး ဦးဆက်အောင်က ၎င်း၏ဖေ့စ်ဘွတ်ခ်တွင် အသိပေးရေးသားထားသည်။

အဆိုပါ ထောက်ပံ့မှုများအနက် ပမာဏတစ်စိတ်တစ်ပိုင်းကို မြန်မာအစိုးရ၏ နိုင်ငံတော်ဘတ်ဂျက်သို့ ထည့်သွင်းရန် နိုင်ငံတကာဖွံ့ဖြိုးရေးမိတ်ဖက်အဖွဲ့အစည်းများနှင့် သဘောတူညီမှုရခဲ့ပြီး ယခင်အစိုးရအဆက်ဆက်တွင် ယင်းသို့ နိုင်ငံတော်ဘတ်ဂျက်သို့ ကူညီထောက်ပံ့မှုမျိုး နည်းပါးကာ စီမံကိန်းတစ်ခုချင်းစီအလိုက်သာ ထောက်ပံ့ခဲ့ခြင်းမျိုးဖြစ်ကြောင်း ၎င်းက ဖော်ပြသည်။

“နိုင်ငံတော်ရဲ့ Public Financial management (PFM) နဲ့ ဆောင်ရွက်မယ့် Action plans များကို အတိုင်းအတာတစ်ခုအထိ ယုံကြည်မှုရှိမှသာ Budget support အဖြစ်ပေးတာဖြစ်ပါတယ်” ဟု ၎င်းက ရေးသားထားသည်။

အဆိုပါ CERP စီမံကိန်း ထုတ်ပြန်ပြီးနောက် မေလ ၇ ရက်နေ့တွင် စီမံကိန်း၊ ဘဏ္ဍာရေးနှင့် စက်မှုဝန်ကြီးဌာန၊ ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာနနှင့် နိုင်ငံတကာဖွံ့ဖြိုးမှုမိတ်ဖက်အဖွဲ့အစည်းတို့ ဗီဒီယိုကွန်ဖရင့်ပြုလုပ်ကာ အစိုးရ၏ CERP စီမံကိန်းကို ကူညီထောက်ပံ့ရန် သဘောတူညီခဲ့ကြခြင်းဖြစ်ကြောင်း ၎င်းထံမှ သိရသည်။

ထို့ပြင် အစိုးရ၏ CERP စီမံကိန်းတွင် ငွေပမာဏဖော်ပြထားသည့် လုပ်ငန်းဆောင်ရွက်ချက်မှာ အနည်းငယ်သာ ပါဝင်သည့်အတွက် ယင်းအပေါ် အမြင်မတူမှုများရှိနေသော်လည်း အမှန်တကယ် အကောင်အထည်ဖော်မည်ဆိုပါက အမေရိကန်ဒေါ်လာ သန်းနှစ်ထောင်ကျော်ခန့် သုံးစွဲရမည်ဖြစ်ကြောင်း ၎င်းက ရှင်းပြထားသည်။

ဒေသတွင်းအာဆီယံအဖွဲ့ဝင်နိုင်ငံတချို့ဖြစ်သည့် အင်ဒိုနီးရှားနိုင်ငံသည် စီးပွားရေးလှုံ့ဆော်မှုအတွက် အမေရိကန်ဒေါ်လာ ၃၅ ဘီလီယံကျော်၊ ထိုင်းနိုင်ငံသည် အမေရိကန်ဒေါ်လာ ၆၅ ဘီလီယံကျော်နှင့် မလေးရှားနိုင်ငံသည် အမေရိကန်ဒေါ်လာ ၆၄ ဘီလီယံကျော် သုံးစွဲမည်ဖြစ်ကြောင်း Asean Briefing ဝက်ဘ်ဆိုက်တွင် ဖော်ပြထားသည်။

လေးစားစွာဖြင့် ခရစ်ဒက် .The Voice Journal

Add a Comment

Your email address will not be published. Required fields are marked *